ព្រះមហាក្សត្រ នៃព្រះរាជាណាចក្រកម្ពុជា ថ្វាយព្រះភ្លើងព្រះសព សម្តេចរាជបុត្រីព្រះរៀម នរោត្តម បុប្ផាទេវី ទេពនាដវដ្ដីឯក
25-November-2019 | ដោយ ពលមនសិការ
ភ្នំពេញ៖ ព្រះករុណាជាអម្ចាស់ជីវីតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទាំងទ្វេសព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះពិធីថ្វាយព្រះភ្លើងព្រះសព សម្តេចរាជបុត្រីព្រះរៀម នរោត្តម បុប្ផាទេវី ទេពនាដវដ្ដីឯក នៅព្រឹកថ្ងៃចន្ទ ១៤រោច ខែកត្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៥ ខែវិច្ឆិកា ឆ្នាំ២០១៩ នៅទីព្រះមេរុ មុខវត្តបុទមវតីរាជវររាម រាជធានីភ្នំពេញ។
សម្តេចរាជបុត្រីព្រះរៀម នរោត្តម បុប្ផាទេវី ឧត្តមប្រឹក្សាផ្ទាល់ព្រះមហាក្សត្រ និងជាសមាជិកាក្រុមប្រឹក្សាធម្មនុញ្ញ បានយាងសោយព្រះពិរាល័យ កាលពីថ្ងៃចន្ទ ៧រោច ខែកត្តិក ឆ្នាំកុរ ឯកស័ក ពុទ្ធសករាជ២៥៦៣ ត្រូវនឹងថ្ងៃទី១៨ ខែវិច្ឆិកា ឆ្នាំ២០១៩ វេលាម៉ោង១២នឹង៣០នាទី ដោយ ព្រះរោគាពាធ ក្នុងព្រះជន្មាយុ៧៦ព្រះវស្សា នៅមន្ទីរពេទ្យនៅទីក្រុងបាងកក ប្រទេសថៃ។ ព្រះសពតម្កល់ធ្វើបុណ្យតាមព្រះបវេណី និងព្រះពុទ្ធសាសនានៅក្នុងវត្តបទុមវតី រាជធានីភ្នំពេញ។
សូមឧទ្ទិសបួងសួងដល់វត្ថុស័ក្តិសិទ្ធទាំងអស់ ជួយលើកស្ទួយដួងវិញ្ញាណក្ខន្ធរបស់សម្តេចរាជបុត្រីព្រះរៀម នរោត្តម បុប្ផាទេវី បានយាងសោយសុខក្នុងសុគតិភពជានិច្ចនិរន្តន៍ ហើយយើងទាំងអស់គ្នាត្រូវខិតខំប្រព្រឹត្តិនូវអំពើល្អ ធ្វើបុណ្យ ដាក់ទាន រួមកម្លាំងគ្នារក្សានូវសុខសន្តិភាព ស្ថិរភាពនយោបាយ ដើម្បីអភិវឌ្ឍប្រទេសជាតិរបស់យើងឲ្យមានការរីកចម្រើនគ្រប់វិស័យ ទាំងអាណាចក្រ និងពុទ្ធចក្រ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕
ចំនួនអ្នកទស្សនា
- ថ្ងៃនេះ3101
- ម្សិលមិញ20231
- សប្តាហ៍នេះ82181
- ខែនេះ104061
- ឆ្នាំនេះ104061
- សរុប20546517